Pálmi Rafn og Þórunn Hilda ráðin til KR.

Pálmi Rafn og Þórunn Hilda ráðin til KR.

Pálmi Rafn Pálmason hefur verið ráðinn sem íþróttastjóri KR. Hann kemur til félagsins frá fyrirtækjaþjónustu VÍS, en er okkur KR-ingum vel kunnugur þar sem hann hefur spilað með meistaraflokki karla í fótbolta síðan 2015. Pálmi hefur yfirumsjón með öllu faglegu starfi félagsins, umsjón með fræðslu og forvarnarstarfi ásamt því að vinna náið með deildum félagsins að áframhaldandi uppbyggingu þeirra, skipulagi og framkvæmd.

“Það eru mjög spennandi tímar framundan hjá KR og ég get ekki beðið eftir því að taka til hendinni og vera þáttur í frekari uppbyggingu í félaginu,” segir Pálmi.

Þórunn Hilda Jónasdóttir kemur inn sem markaðs- og viðburðastjóri KR. Hún kemur frá Háskólanum í Reykjavík þar sem hún starfaði sem viðburðastjóri á markaðssviði.

“Ég er virkilega spennt að koma inn í KR og taka þátt því öfluga starfi sem hér fer fram,” segir Þórunn Hilda.

Hennar hlutverk hjá félaginu er að þróa og viðhalda ímynd og vörumerki KR, afla nýrra markaðstækifæra, ritstýra og hafa umsjón með helstu miðlum félagsins sem og viðburðastjórnun á stærri viðburðum, ásamt því að vera öllum deildum og foreldraráðum innanhandar varðandi fjáraflanir.